有病就要睇醫生？勞福局局長羅致光耍手擰頭。立法會政府帳目委員會今日就社會福利署管理整筆撥款進行公開聆訊，八方諗住睇勞工及福利局局長羅致光（CK）點樣拆彈還擊，但帳委會主席石禮謙開場白就表明，今日改為社署署長葉文娟擔大旗，由佢發言，「局長今日把聲唔掂！ 」

事緣CK上周五直踩幾場，一場演講都講足兩粒鐘，又出席唔同活動，加上天氣轉凍，搞到聲帶發炎，出唔到聲，噚日佢抱病出席立法會福利事務委員會會議時，仲係沙沙啞啞咁發聲。

八方今日問候過CK有冇睇醫生，點知佢擰晒頭，「我一向都唔睇醫生」，無論中醫定西醫都耍手，佢話飲水同休息就夠，今日都勉強可以開到聲。

CK向來有做開運動，最近又參加渡海泳，一直都好注重身體健康。佢同八方講，自1993年起都冇睇過醫生，「打預防針唔算啦」，有時輕微發燒都靠休息自癒，亦甚少有腸胃炎。佢仲笑笑口話，對上一次失聲已經係1998年。

民主黨立法會議員林卓廷知道CK失聲，打趣話佢可以打手語。阿廷可能深知CK性格，面對議員質疑又點抵得住呢，當佢講到鄰舍輔導會錯估財政導致裁員，CK即澄清話機構最終冇裁員；有議員不斷問機構儲備同津助計法，CK就由整筆撥款盤古初開講起，亦不時糾正，「係講緊累積儲備」、「撥款過程我哋唔睇預算」，佢話驚議員有少少誤會。

至於擔大旗嘅葉文娟表現都唔差，但可能被CK傳染，不時發言失聲或食螺絲，佢笑說下午把聲會好啲。不過，石禮謙多次叫佢對準啲個咪，葉文娟就話佢用個咪同其他人唔同，收音特別細聲喎。