狗係人類最好朋友，尤其視障人士，導盲犬就係佢哋「眼睛」。愛狗嘅梁靖琪（Toby）近日應邀為一個慈善義賣做推廣大使，該活動部份捐款會幫助香港導盲犬服務中心，Toby日前就往探訪導盲犬。

訪問當天，該會主席兼領犬員張偉民（Raymond）帶嚟5歲黑色導盲犬Tovi，佢係拉布拉多品種，Tovi係出自電影《導盲犬小Q》中提到關西嘅導盲犬學校，Tovi喺4個月大時就離鄉別井嚟咗香港，佢仲係香港導盲犬服務中心嘅「種犬」，負責開枝散業，佢一年前做咗爸爸，生咗5隻小狗，佢啲狗仔o依家接受緊訓練，一年後就可以送出去幫助視障人士。

當Toby遇上Tovi，Toby較熱情，Tovi內歛淡定，領犬員Raymond安排Toby帶Tovi「出更」，為咗親身體驗視障人士感受，Raymond給Toby戴上特定眼罩，令佢短暫失明，然後指導Toby帶導盲犬出街時要注意地方，導盲犬要企主人左面，所以Toby要左手拎狗帶，右手捉着導盲鞍，一邊行，一邊給Tovi指令。

領犬員Raymond先傍實Toby同Tovi出更，Toby完全信任Tovi，跟佢沿路去附近公園，其間甚至由Tovi導航帶Toby過馬路，Toby由緊張變適應。到達公園，Tovi行近椅子，用頭示意Toby可以安全坐下。Toby坐下才脫去眼罩接受訪問，講到「失明」15分鐘感受：「我揀咗完全睇唔到嘢嘅眼罩，跟住Tovi出街，我係好緊張，睇唔到嘢原來影響行路有啲唔平衡，會企唔穩。過馬路時我聽到紅綠燈咇咇聲，我感受到Tovi喺過馬路時會行得慢啲。」

導盲犬平日陪視障人士出街基本上係點對點，Toby由Tovi陪住佢走一會，Toby話：「佢會就番我步伐，呢個拍檔100分。佢真係會變為你最好嘅朋友，等於有最信賴嘅人喺身邊。每個人都需要伴侶，何況視障人士係更加需要，佢哋唔可以長期依賴有人喺身邊，導盲犬雖然唔識對答，但佢畀到視障人士好大安全感。」Toby同Tovi短暫相處已建立一份信任。

Toby家中飼養嘅金毛尋回犬Odie上年離世，愛犬陪咗佢14年，Toby今次接觸過導盲犬，佢有興趣將來做佢哋寄養或收養家庭：「我自己養狗就好縱佢，但做寄養導盲犬家庭要守規律，唔可以放縱，唔可以亂獎小食。香港o依家導盲犬數量仲係不足以幫助視障人士，好希望大家踴躍報名照顧BB狗，為視障人士出力，真係好有意義，我都叫緊媽咪加入。」　

更多娛聞，喺晒《娛果》
http://fb.com/appledailyent