《蘋果》動新聞果燃台《玄機解馬》第二季第26集，將於今午（22日）6時半開播，將從玄學角度向大家講財運。

繼上兩集分別請到女評馬人Cloudy同新晉女歌手姜嘉欣上嚟後，今集就輪到靚女財經記者阿Faye做嘉賓啦！

阿Faye雖然年紀輕輕，但其實之前做過親子版及寵物版記者，媒體經驗非常豐富。

不少人話女財經記者，比較容易認識到富二代、金融才俊等條件優秀嘅筍盤男，到底現實係咪咁？

阿Faye親自解畫，佢話的而且確較易接觸有錢人，但有冇機會嫁入豪門，就要聽聽阿Faye同碧霞老師（Yoki）點講。

喺《碧霞點相》環節中，碧霞老師指出阿Faye八字一生平穩，事業未必大起大落，而且可能同父母尤其父親關係不太親密。

至於阿Faye嘅眉毛較粗較濃，在女仔而言代表啲乜？

碧霞老師在節目中會詳細講解。

今集《運程學堂》主題會探討妒忌心重的人之面相及手相，包括「印堂窄」、「覆舟嘴」、「三彎鼻」、「耳後見腮」、「三白眼」、「眉毛稀疏」，以及掌紋「感情線太長」共七大特徵。

碧霞老師講明，如果身邊有呢類嘅朋友，隨時打醒精神，避免自己受害，各位觀眾要注意喇！

最後，碧霞老師聯同另一主持Marcus，在《贏馬錦囊》環節提供周日（23日）沙田日賽心水馬推介，另《賽日通勝》會拆解哪個生肖這個賽日最旺。

咁豐富嘅內容，你點能夠錯過今集《玄機解馬》？