林峯、雨僑、莊思敏、余德丞、丁子朗、陳倩揚、顏子菲及應屆港姐陳曉華、鄧卓殷及丁子田等到沙田馬場參與活動。

林峯本身係馬會會員，但每次入馬場都係為工作，佢話身邊有唔少朋友都係馬主，下年仲可能會同朋友合資買馬做馬主。對於有報道指舊愛吳千語求復合？林峯話：「我記得一年前同傳媒朋友講，感情嘢唔再分享，希望大家將專注力放喺我同團隊作品上。」

早前扭傷腳嘅雨僑，休養近一個月，終於可以着三吋高踭鞋，佢話當日着波鞋上樓梯時仆親，起初都唔知係韌帶撕裂，好彩今個月只係拍劇，工作方面冇太大影響，問到老公羅力威有冇悉心照顧？佢就話：「佢有話孭我，不過我驚佢將我頭同腳撞埋門框，所以我唔肯，佢仲嬲嬲豬㖭。」對於HMV被指財政唔太好，雨僑話相信老闆蕭定一嘅能力，雖然老闆未有親自派定心丸，但高層們已開會清晣表示一切運作正常。

至於首次入沙田馬場嘅余德丞，佢話自己一向冇横財命，所以好少賭博，最多都係新年嗰陣陪屋企人打麻雀。今年聖誕，余德丞將出外拍旅遊節目，所以唔約得蔡思貝慶祝。

港姐冠軍陳曉華話自己唔鍾意太名貴首飾，平時只鍾情簡約款式，亦會靠自己能力買，唔會要其他人送。亞軍鄧卓殷就話男友送嘅飾物意義大過價值：「例如係刻啲字或者日子，好值得紀念。」

精選娛聞，喺晒《娛果》
http://fb.com/appledailyent