大台經典劇《尋秦記》入面，項少龍由現代返到古代，幫盤兒統一六國，成為秦始皇。大家又有冇諗過如果楊過、小龍女、郭靖等嘅經典武俠人物嚟到現代，又會發生啲咩事？大家又會想佢哋做啲咩呢？

動記者Cathy同表妹今次去到街頭，睇吓如果畀大家做金庸，又會使出乜嘢招數，搞啲乜東東？有人話：「我好鍾意郭靖降龍十八掌，我覺得Treegun佢個人好正經，但佢講出嚟啲嘢都幾有趣，間唔中佢會講一兩句成語，郭靖心諗唔知佢做緊乜，就一巴巴車埋去，廣大市民同立法會議員一齊食花生，個畫面都幾過癮。」；「何俊仁同韋小寶一齊上蘭桂坊夜蒲。」；「楊過就梗係用倚天劍加埋打狗捧法，去到金紫荊山大戰689」。

原來一班街坊都勁有創意，務求將各路門派嘅英雄人物配合唔同絕技同武器對付「大反派」人物Treegun、689等。係咪未夠喉？仲想聽多啲更爆嘅橋段？即刻去片！

此外，適逢今年書展以武俠文學為主題，由聽日(7月20日) 至到7月26日會喺灣仔會展舉行，到時唔知會唔會見到滅絕師太去搶武林秘笈呢？

採訪：植詠珊(Cathy)、何宛珊(表妹)
攝影：Teddy、Neo