江若琳07年以歌手身份出道，中段曾偏離航道，主力拍戲拍劇，為紀念今年入行十周年，佢決定以歌手身份重返舞台，並於9月9、10號喺九龍灣國際展貿中心舉行一連兩場《我只不過是江若琳演唱會》，順便慶祝佢9月30日就30歲牛一。

試勻歌影視，江若琳覺得歌手身份才是真我：「拍戲係演別人嘅角色，唔係真正嘅我，但歌曲可以表達自己，我會將自己故事放入音樂，歌迷就可以即時接收。」江若琳自爆人生低潮時，全靠音樂救回一命：「之前返內地工作，長時間好孤獨，面對四道牆，我擘大眼就塞住耳機，到片場埋位先拎開，拍完又聽到返酒店，歌曲一路陪住我。一首好歌可以陪住一個人成長，共同度過艱難路。我都希望可以將正能量放入歌曲，令面對困難嘅人開心啲。」當日救活江若琳嘅係許志安唱嘅《一步一生》：「最尾一句『但笑着吃苦的氣力，我有』，係我呢十年寫照。」

江若琳出道捱足三年，於10年1月15日先喺九展舉行處女騷《Show You My First Show》，其後佢主力拍戲，近年則為合約糾紛官司跑數賺律師費，所以呢次排除萬難再開個人騷，真係等到頸都長。回想七年前嘅處女騷：「嗰晚我夢想成真，我喺台上大聲呼叫『呢世都記得呢一日』，到2017年9月9號同10號，我都會講番。」

今次十周年紀念騷同在九展，上次喺大場可容納3000位觀眾，佢施展渾身解數勁歌熱舞。今次卻只能喺僅坐1500人細場搞騷，佢無悔無怨：「細場同大家仲close，閂埋門一家親。」江若琳呢幾年受合約糾紛困擾，籌備演唱會時更遇重重波折，差點撻Q，最後都籌集到資金，到底係咪要出動埋「姑婆本」？江若琳好抵死話：「哈，棺材本呀，今年返嚟做歌，我拎咗血汗錢實現自己夢想，幸好仲有好多善長仁翁、商戶同品牌支持，令我冇咁大壓力。」

江若琳本有意喺生日正日搞演唱會，可惜檔期事與願違，不過可以揀到同一月份，佢都心滿意足：「呢份係好有意義嘅生日禮物，入場都係好錫我嘅人，同我開party慶祝，無論係我陪你成長，抑或你陪我成長都好，一齊回顧我十年回憶。」

演唱會主題用到「只不過」三字，係咪玩矮化？江若琳就話：「唔好當矮化，做到只不過先係世上最無敵、最強大。人遇難關唔開心，因為放自己太大，任何嘢將自己縮到最細，好渺小嘅話，冇嘢係過唔到。呢十年，我覺得經歷咁多嘢，我只不過......係一個女人仔，希望唔好再蝦我。」江若琳享受活在當下，佢感恩揀到適合自己職業，工作後就係普通女仔：「我都享受生活，渴望被愛，我唔係明星或偶像，只想做一個最快樂嘅江若琳。我唔想話畀人知我有幾勁，我經歷同大家大同小異，遇到挫折同大家一樣。」下一個十年，屆時40歲嘅江若琳仍會開騷回饋歌迷嗎？佢話：「到時唱唔到《傻豬》啦，可能到時要請特別嘉賓，就係我啲仔女上台同我唱啦。」

為咗呢兩場騷，江若琳已開始狂操，除每日跑步練氣練歌，佢更做gym練馬甲線，希望到時觀眾可以360度睇到弗爆身形。公開戀情後嘅江若琳，同「生煎包王子」男友蕭潤邦 (Oscar)經常有影皆雙，江若琳仲sweet爆話：「每日做乜都開心有個伴，好有動力，佢仲會監管我飲食。」江媽媽同蕭媽媽當然無限量提供足料靚湯，相信佢將來坐月都唔使擔心。江若琳係咪享受被男友監管？佢冧住話：「可能我犯賤，唔係管嘅，係關心。」

採訪：陳杰、懷鈺
攝影：仇志德
攝錄：馮峰、Neo
場地：WOW Fitness
髮型：Kel Fung of HH Hair
服裝：Puma

【我們的演唱會1】72歲葉振棠潮玩電動車航拍 盼搬上紅館舞台
http://bit.ly/2wJxhIp