原來外援新例係根據2000年,歐盟同3個地區簽訂嘅《科托努協議》(CotonouAgreement),主要為推動該地區經濟發展為目的,於是容許該區喺歐洲工作嘅人民擁有歐盟身份。唔知其他聯賽會唔會效法西班牙足總做法呢?
呢次西甲自殺式改革,係由最乞我求大俠憎嘅皇馬會長卡達朗提出(基達菲係幫兇),果然係無惡不作!呢位律師會長唔識波,一味靠把口同皇馬個招牌,警告足總話西班牙皇室06年已承認科托努協議,點解仲唔喺球圈實行?足總最後惟有妥協。
呢場西甲球壇生態大災難爆發在即,第日西班牙本土球員將更加失去生存空間。有料嘅西班牙球星將外流到英超或意甲,好似法比加斯呢類天才被賣到外國嘅情況將更加普遍。久而久之,西班牙國家隊人才輩出嘅盛世亦會成為過去,所以呢個卡達朗簡直就係西班牙足球嘅「切爾諾貝爾核災難」!