現年54歲嘅台灣男歌手齊秦，於2010娶咗佢年輕24年嘅孫麗雅做第二任妻子，並育有3歲女兒齊心。

而噚日齊秦再做老竇，孫麗雅喺台灣為齊秦生下兒子，啱啱好湊成個「好」字。

齊秦今年喺1月親口承認嬌妻再度有喜，當時老婆已經有4個月身孕，原先預產期係7月，噚日乖仔早咗出世。向來低調嘅齊秦，未有特別喺微博或社交網站報喜，不過有傳媒求證齊秦經理人公司，工作人員亦證實喜訊，不過仲未幫BB仔改名。

恭喜齊秦再做老竇，囝囝快高長大、身體健康﹗