銀創（706）呢期主攻祖國自動櫃員機（ATM）業務，有排發。銀創已經同全國銀聯11家分支簽訂自家ATM布放協議，計劃5年內，喺全國一線城市布放幾萬台ATM機。查查資料，ATM營運商喺每筆跨銀行結算交易嘅分成比例收費，約莫係2元。計計數，假定3萬台ATM機、兩蚊分成比例收費，1日24小時，就算好保守計，只得50個客仔透過ATM提存，ATM營運商1年收取嘅服務行政費，已經講緊高達10億銀。當純利率只有10%，純利都講緊1億銀。以呢個分成模式參考，銀創嚟緊幾年順風順水，純利係上億銀計數，預期PE得4、5倍。
再講，祖國市民生活模式改變，用ATM嘅數量，會係幾何級上升，銀創繼續肥仔水。市場畀同類股高陽（818）嘅P/B，超過10倍，銀創P/B不過1倍多啲，銀創現價（0.305元）翻半番，P/B未到兩倍，翻一番唔出奇，P/B都只係2.4倍，未有耐反映到ATM爆炸前景。

兩個points追炒麗國

麗國（191）連觀塘鱷魚恤大廈重建，及嚟自阿仔麗豐（1125）嘅增值，NAV起碼秤到上2.4元，現價（0.64元）折讓73%，資產大平賣。又呢期市場炒落後，隻隻非中資類嘅二三線炒到飛起，麗國一年未郁過，落後到爆。麗國啱啱破咗1年橫行阻力，追炒麗國，博翻半番見0.96元。到時，麗國NAV折讓仲超過50%。
錢雋