英超周日早場車路士主場0:0賽和阿仙奴，兵工廠都曾經擺個波入網，75分鐘中堅梅斯達菲頭槌頂入網，不過因為越位在先，入波作廢，不過呢位德國國腳聽唔到球證雞聲照走去場邊慶祝，結果俾英國傳媒同網民恥笑。

不過梅斯達菲唔係1個人真心膠，事關佢走到場邊，仲有1位廠迷衝入球場一齊慶祝，呢位廠迷事後俾保安帶走，梅斯達菲事後就將同廠迷慶祝相放上個人Twitter，仲話：「至少我唔係1個人慶祝。」