Eason陳奕迅今日出席「領賢慈善基金活動」，佢就話自己都係領賢嘅一份子，仲話好欣賞張太(王幼倫)嘅主動，想令大家接觸多啲藝術。問到佢囡囡康堤多唔多接觸藝術，Eason話：「都多o架，多數都係喺學校接觸囉！佢鍾意聽歌同睇戲，都oko架喇！平時學業已經好辛苦，其實識得欣賞一樣嘢係最緊要。」咁Eason有冇諗過開班授徒？佢就話：「唔得，我未有文憑，不過就可以分享！」

之前Eason表示好欣賞童童(竇靖童)，會唔會想囡囡康堤同童童多啲交流？Eason表示：「佢唔係成日喺香港，不過有機會希望多啲交流o架，但佢兩個都怕羞。」咁你又想唔想同童童合唱呢？佢話：「都希望有o架！不過廣東話就抆啲，可能童童英文歌詞會啱佢表達多啲，佢真係好正好有型。」覺唔覺童童有王菲嘅影子？Eason直言：「實有啲，聽耐啲就有唔同，佢唱英文好多外國人嘅feel，我自己識英文都明，其實冇咩所謂，我都好恨唱英文歌，不過公司話唔係主要市場，我成日都話希望畀我任性一次，最多我自己畀錢出碟，出single都得o架嘛！」

問到Eason有冇留意童童性取向？Eason表示：「冇辦法啦！新聞嚟o架嘛，不過其實香港讀者相對呢方面嘅新聞特別有興趣，個心好open，但係又怕羞！」如果康堤同同性朋友close啲身為爸爸又會唔會介意？佢又話：「其實都係正常，冇乜所謂，最緊要每個人都要揀自己嘅路，肉體嘅嘢係唔重要，最緊要心靈上溝通到！」