其他大行甚至轉軚睇好。大摩年初原預測今年樓市跌一成,至7月份更改為看好樓市,認為需求釋放,2014及2015年樓價各升5%,由跌一成改為睇好未來兩年合共升一成,轉軚力道強勁。
同樣原本睇跌一成的花旗,年中改口指中小型住宅樓價持平,至第三季更列出三大理由睇好本地地產股,曲線唱好樓市,最新更預測明年樓價升8%,認為明年2月企業派發花紅及加人工後,3月樓市將現小陽春,呼籲「盡早上車」。
不過,瑞銀相信明年本地一手及二手樓價將按年跌半成至一成,料樓市「十年大浪」終告結束,寬鬆貨幣政策已令本港樓價10年間勁升3.2倍,隨着美國明年加息,將拖累本港樓市,而本港樓宇供應逐步增加,樓價會拾級而下。