6.9、6.12、6.16、7.21、8.31……這些重要日子，自去年反送中運動後，已深深烙印在港人心中。

為反惡法，激發6.9當日超過100萬人上街，但政府仍於當晚發新聞稿，宣佈如期於6.12恢復《逃犯條例》修訂二讀辯論，並要求警方在立法會大樓候命。結果去年今日，大批市民凌晨零時許，聚集立法會及政府總部，其後到金鐘聲援的巿民越來越多，二讀會議未能如期舉行。警方為驅散示威者，先後多次發射布袋彈、胡椒噴霧及催淚彈，場面緊張，警方的鎮壓行動並沒有為事件畫上句號。過去一年間，政府無能，巿民雖面對警方濫捕和濫暴，仍堅持不停上街表達訴求。近日人大通過「港版國安法」草案 ，一國一制事在必行，加上《國歌法》，港人抗爭路阻滯重重。

黃絲藝人中，王宗堯一直無懼走在前線助手足，去年的6.12也親到金鐘現場支援，還不斷來回補給物資，更目擊市民中催淚彈，感受特別深。王宗堯去年9月30日被警方拘捕，指他7.1涉嫌串謀刑事毀壞及進入或逗留立法會會議廳範圍，本月9日，律政司加控王宗堯等其他涉案人暴動罪，為抗爭惹了官非。不過，並沒有動搖王宗堯繼續為港爭取民主自由。

回顧過去365日，王宗堯日前接受《蘋果》專訪時說：「感覺呢一年發生好多事，人生歷練多咗，好多人瞓唔到覺，再加上香港疫情、限聚令，而家又有《國歌法》同《國安法》 ，法律框架下嘅審判，都有唔同結果。過去嘅一年畀我最大感覺係香港嘅自由同言論空間，香港人同民主距離，係接近咗定遠咗？我覺得真正自由制度收窄咗，但同民主係近咗。」

社運影響了王宗堯的人生觀和價值觀，「以往會覺得好多安排，香港人好實際，無論點追夢都會有計劃，但呢一年，對自己人生規劃少咗好多長遠打算，冇辦法為人生定一啲目標，以往我哋會想有一定收入、物業，甚至去旅行，而家完全冇晒呢啲物質上嘅追求。價值觀亦改變，以往買嘢會睇嗰樣嘢價值、設計，本身係咪名牌，質料好唔好、興唔興、多唔多人鍾意，而家去買嗰樣嘢會諗係咪值得支持、有冇更加大價值值得支持、係咪超乎享用價值、係咪幫到人？」變得更宏觀？他肯定地說：「係，要堅持提醒自己每日做呢樣嘢其實最難，好多時香港人好善忘。」問到王宗堯對過去遊行活動，哪一幕留下最深刻印象？他想了想，「8.11嗰日銅鑼灣希慎附近出現便衣。」那一晚不少年輕人被卧底警察混入抗爭者中，突擊拉人，有示威者甚至被打甩牙，滿口鮮血遭制服地上求饒。

香港抗爭情況一直備受外國關注，王宗堯表示對前景抱有信心，尤其近幾個月轉打國際線，他說：「國際線上，要keep住打嘅，今年係立法會選舉年，呢個議會戰線同街頭戰線同樣緊要。」他目標是「黎明來到，要光復，這香港」，所以，禁不住爆seed：「黎明前嗰刻係咪好X黑？係真係好X黑，但會抱住呢個期望，黎明應該好快到。因為行到《國安法》，真係幾冇棋嘅一步，其實係將香港國際地位掟落地揸爛佢。」

「黃底」的王宗堯早已失去大陸巿場，碰上武漢肺炎令百業蕭條，娛樂圈都大受打擊，他坦言老本縮水：「大家都好艱難，所有嘢環環相扣，當收入有影響，出街意欲會低，娛樂少咗，消費少咗，商家生意差咗，成個經濟都受影響，條街好多吉舖，變相金融差咗，香港冇埋國際地位，資金撤走。」王宗堯跟升斗巿民一樣，要勒緊肚皮：「我不嬲唔算大使，唔會特登去使錢追求物質，應使則使，我可食茶記、雲吞麵都開心，錢會用喺值得嘅嘢身上，支持黃色經濟圈。」工作量不多的王宗堯，絕不後悔出錢助手足解困，「我覺得永遠只有做唔夠，大家覺得大人應做幾多嘢，真正將自己個心擺呢件事上，就會覺自己做得唔夠，究竟用咩形式做、點樣做先可真正幫到佢哋？好多時講黃色經濟圈，點樣持續落去同經營先達到真正受益、唔係人血饅頭，呢樣都好緊要，好多人都濫用咗人嘅善心，去做投機商業行為，希望大家本住良心做嘢。」

自從人大通過「港版國安法」，即掀起移民潮，曾說過會留守香港的王宗堯至今未有受惡法動搖，「以前由我返嚟香港發展，咁多年轉過好幾間公司，有長輩曾同我講要申請一本特區護照好方便，我就可以有兩本（護照），但我一路冇申請，想去剪都冇得剪。我之前有聽朋友講，到底移咗民完全唔理，放低晒去適應當地生活，落地生根，定係你選擇留喺香港，做隻鴕鳥定港豬？完全唔理，當冇呢啲事發生，又或人在外國依然放唔低，每日都睇住香港新聞，呢幾種生活都係好折磨，我既然要選擇，再堅持到就決定繼續堅持。」

王宗堯的官非未完，「法律程序本身係一個好漫長嘅時間，佢主要消磨你嘅意志，呢段期間保釋，又有禁足令、宵禁，扣留旅遊證件，限制個人自由，所有嘢係人權剝奪。我寧願早啲解決，如公平審訊，我絕對尊重，背負住除咗個人審訊，而家keep住出嘅案例，審判都會畀後面案件做參考，每單官司都要小心啲打。而家香港人冇犯法機會細過有犯法，隨時行街都會犯法，會有一個人集會，同兩個人示威，四人限聚令，三個人又拎過告票，八人限聚令，七個人又被指有共同意圖，佢哋發告票理由係執法，叫你有乜就同個官講，呢個係唔人道，香港警察執法中唔存在人權、人道，好多白色恐怖，其實如果尊重一樣嘢，係唔需要用立法逼人去尊重。」

王宗堯本周三再應訊，但出庭前一日卻被律政司加控更嚴重的暴動罪，最高刑期判監十年。捱過漫長一年抗爭，而抗爭尚未成功，他卻要面臨嚴峻官非，有機會賠上自己前途？王宗堯周三離開法庭都表示想過有機會留案底，可擔心坐監？他說：「冇得話擔心唔擔心，因為知道係咩刑罰，都知道係荒謬。所以，我會有最壞嘅打算。」

最令王宗堯放不下當然是至親的家人和愛貓，「家人、寵物都有一個方案，大家雖然好沮喪，但都有理性的應對。」他的父母仍後生，家中也有胞弟，家人生活上應問題不大，必要時愛貓也會交託朋友照料，他直認雙親擔心：「對父母會有點愧疚。」

行到這一步，王宗堯覺得算是他人生最大打擊嗎？「唔算係打擊嘅，每個人嘅機遇都有不同。」此刻，王宗堯的心態仍然樂觀正面。「香港人都唔應該咁不幸，我自己睇得比較豁達。」他與手足們的付出，香港人會記得，王宗堯說：「總覺得一個地方好，所有嘢都會好。自己好成個地方都唔好，咁都都冇意思。」無論前路多茫茫，王宗堯的目標都未有動搖。

訪問當日，王宗堯到深水埗撐民主女神像展覽，他再在連儂牆貼上「香港人。不死」memo，同時寄語大家：「香港人要執生，形式上要去堅持，要識走位，唔好『送頭』，保護咗自己先，唔好再有無謂犧牲。每次見有濫捕事件，隔一排就有好多自殺事件，呢啲係我哋唔想見到。」

撰文：比華利
攝影：仇志德
攝錄：廖達燊
場地：openground

-----------------------------

打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新