香港地咁細，大台每次出去拍外景都好大陣仗，難免造成不便。

單係今年都發生過最少兩次滋擾或者阻街，先係今年2月，田蕊妮同蕭正楠等人喺跑馬哋拍《超時空男臣》，但因為事先冇申請，令樓上居民好好奇，有人用電筒照睇下條街發生咩事，工作人員仲「o殊 」番居民轉頭。

到咗今年4月，陳敏之為新劇喺銅鑼灣波斯富街開工，場戲講敏之過馬路差啲俾的士撞到。由於當時架的士擋路，拍攝時工作人員又要截停其他車，結果令交通受阻。

再數前幾年，《拆局專家》喺中環擺花街拍打鬥戲，因為拍攝器材多，令條街窄上加窄，車輛經過要慢駛。有的士司機覺得拍攝太阻街，於是入空波發出「隆隆」聲以示不滿。另外《殭》前年喺西環拍攝，夜晚11點幾都未收工，仲開晒射燈同大大聲講嘢，結果有居民報警投訴滋擾。當時有份拍攝嘅陸永就話，咁啱附近另外有電影拍攝，可能真係會有滋擾，深夜拍劇會盡量細聲。