猶如「烈火奶奶」上身嘅江美儀，因為於節目《街市遊樂團》中經常鬧 「下把位」嘅Andrew，令唔少師奶網民都睇唔過眼。顧紀筠噚日接受訪問時都話：「我平時唔會打唔會鬧Andrew，都多謝美儀佢幫我教吓個仔，咁節目有分上把下把位，佢鬧Andrew係想袋錢入佢袋啫！」（新聞連結： http://bit.ly/2ge3aiV )

至於Andrew接受傳媒訪問時亦稱自己係抵鬧，仲話江美儀乜嘢都鬧一餐「其實係節目效果啫，我有時講嘢係唔經大腦，美儀係錫住嚟鬧，依家冇鬧反而有啲掛住佢把。」(新聞連結: http://bit.ly/2gXTOGo )

一片是非之中嘅江美儀，今日應邀到觀塘出席香港學生輔導會親善大使海報拍攝。明顯有備而來嘅江美儀，一一回應傳媒提問：

1.呢期是非不絕？
「唔使驚，其實都唔係咁大件事啫，自己都平常心啦，係啲人拉埋啲嘢嚟講。」

2.節目中狂鬧Andrew？說話刻薄？
「其實呢個係節目嘅風格，係角色設定，Andrew係下把位，俾我哋恰，俾我哋話，係設定嘅效果。講嗰啲觀眾應該唔係集集睇，如果佢係第一集開始睇就知道風格係點。」

3.節目中你話魚檔啲人每日賺得嗰260蚊，又話剝蝦曬蝦乾係自甘墮落喎！
「其實我唔係話佢哋，我係話我哋幾個大食懶，係話我哋幾個自己人。如果我真係話佢哋，嗰啲檔口就唔會咁開心歡迎我哋去拍啦。」

4.如果真係角色設定嘅話，咁你咪硬食晒？
「咁樣即係證明多人睇，亦都證明我好戲。其實我哋幾個都好錫Andrew，佢又好有禮貌，好尊重人。我都幫咗佢0架，依家個個都識佢啦。」