SMAP出道25周年解散收場，木村拓哉為今年1月播出嘅TBS重頭劇《A LIFE~深愛的人~》擔任主角，雖然劇集口碑一般，但電視台睇在大結局收視都錄得16%，全10集平均收視為14.55%，係今年春季收視冠軍日劇，所以有計劃開拍續集。

《A LIFE~深愛的人~》除木村之外，仲有竹內結子、木村文乃、松山研一、菜菜緒、同埋淺野忠信等陣容。不過，木村拍親劇集都傳是非，唔止開拍前例牌傳出搵唔到女主角，連拍畢後都傳聞多多，有指TBS屬意續集會落在木村同木村文乃嘅感情線上，仲希望可以由木村文乃擔下呢輯女主角。可惜，木村文乃唔多領情，事關佢自己嘅檔期排至明年，佢亦唔想因被定型成「木村女伴」而影響發展，所以婉拒電視台。