JW（王灝兒）、Jill（衛詩）、組合A2A今午到時代廣場COACH品牌店舖為新出淡香水宣傳。相比起之前為演唱會狂操，JW好明顯發福咗，佢話：「係呀，我完咗演唱會後飛咗柬埔寨六日，每日薯條、咖哩飯，之前冇乜食過飯，一放縱就爆咗出嚟。」跟住將會到韓國玩，JW自嘆又會勁食，真係幾大問題，但同時會做gym平衡番。由於感覺到自己肥咗，JW冇勇氣再上磅，希望下月會完全收拾放假mood，雖然處於放假狀態，但JW反而就有啲倦容，佢笑言：「可能放假，日日瞓。」要回復狀態就要加油喇JW。

Jill o依家簽咗華納唱片，同公司其他藝人夾band創作音樂，彈Bass(低音結他)彈到手指起晒「枕」。Jill同家姐衛蘭都分別減肥瘦身，但Jill成效就明顯過衛蘭，Jill話家姐本身係肥啲。面對瘦身，Jill要全面節食忍口，佢話:「每日只係食蘋果、蔬菜，冇肉食，唔敢偷食，我本身好鍾意食嘢，所以減得好辛苦，會同家姐互相鼓勵。o依家屋企唔會買零食，好肚餓時會食梳打餅。」