日本女星廣末涼子入行多年，雖然做過好多角色，但原來冇扮演過陪酒女郎。最近佢客串朝日電視台特備單元劇《買地區報紙的女子》，喺劇中廣末首次扮演陪酒女，扮到靚靚嘅佢仲要陪男主角、年過70嘅田村正和飲酒。

廣末話演銀座高級俱樂部陪酒女郎，今次係第一次，雖然係客串，但為咗了解角色，廣末特登走去銀座高級俱樂部參觀，仲同媽媽生傾計，觀察佢哋嘅工作，以深入了解陪酒女呢個行業，真係好鬼認真。睇見啲劇照，廣末嘅打扮都真係幾似，而且佢仲揸住田村正和隻手冧對方㖭。