參加「香港美酒佳餚年」啟動儀式，遇到爵士樂發燒友投資L。投資L本是大行律師，後來畀客戶挖角，做做吓，唔搞法律咯，幫公司打理香港以外嘅投資，故名投資L，佢舊年搞咗一個國際爵士音樂節，因為大市未跌，仲可以搵到公司贊助，今年搞唔搞呢？投資L話：「十分頭痛，爵士音樂節一定蝕本㗎嘞，但以現時環境，開口搵朋友公司贊助，自己都唔好意思，但唔繼續搞，又覺得好可惜，舊年本地嘅爵士音樂擁躉，反應十分好啫。」
咁嘅兩難問題，留番畀投資L去頭痛，大家既然參加旅發局嘅「香港美酒佳餚年」，不如講旅遊好過。投資L話復活節期間，佢與美國朋友去埃及旅行，參觀古跡，發覺埃及雖然經歷幾千年內亂與外敵入侵，但好多古跡保存良好，顯得呢個古老國家嘅人民十分有文化歷史意識，到咗現場睇真跡，方能了解文物規模之大，驚嘆古埃及之建築技術先進無比。左丁山問佢埃及究竟有無安全問題，佢話：「開羅周街都係警察！隨時截停行人問話，當地警方竟然知道我哋有美國人在團，不時見到孭住機關槍嘅警察跟住我地！」係囉，美國人命寶貴，台灣漁船被海盜劫持，至今消息全無，無人理會，美國商船被海盜攻擊，美國就立即派驅逐艦、海豹特種部隊營救美國船員，唔怪得咁多人恨歸化美國籍恨到發燒。埃及好怕境內美國遊客受攻擊，嚴密監控美國遊客行蹤，故此投資L與美國朋友一到開羅，就有人「特別招呼」！