西貢唔少短期轉手賺大錢,有啲重係無心插柳。
利嘉閣西貢分行高級經理黃富傑話,啱啱做咗單銀輝別墅,業主半年淨袋二百幾萬。呢座雙數屋,千九呎,另花園千五呎,連雙車位,以千一萬成咗,屬市價。
原業主舊年買入,見佢標致,好鍾意,諗住長揸唔賣,收租算。點知有人出價高三分一話要。冇話有錢唔賺㗎,只好忍痛割愛。
黃富傑講,業主喺內地有好多生意,包括飲食、旅遊及開廠,非常忙。佢好少喺香港,為咗做成單嘢,公司派專人送定去上海。
買家係第二個區外籍客,住開南區大宅。點解轉嚟呢度?黃富傑解釋,原來佢唔少朋友搬咗入嚟。而且用相近價錢,喺南區就搵唔到好似𠵱家咁大嘅洋房。
佢睇咗三四個月、十幾個盤至揀到呢件。
銀輝別墅位近大路,設施多,附近又有超市,加上業主用咗成百萬全面裝修過,合晒要求。
發到出嚟
新年伊始,美銀亞洲照舊請一眾記者春茗,重有紀念品。唔知係咪銀行界對錢特別敏感,份禮物同錢有關,而且勁有意頭。
原來係將28個金幣(1毫子金色錢幣),放入袖珍透明玻璃樽(圖二),送畀記者,意思係「二八易發」。
唔好以為就咁簡單,美銀行政總裁錢乃驥話:「個玻璃樽上面重有個窿,即要發到出嚟!」
份禮唔重,但就夠心思。
普天之下盡君臨
「君臨天下」四個字夠氣勢,好受發展商歡迎。先有寶翠園一期二十四個頂層複式以此命名,後有恒隆九龍站上蓋,現在輪到土瓜灣傲雲峰,第七座五十樓以上相連戶,撞名撞到七彩。
唔知發展商係咪搵人算過,呢四個字嘅筆畫,有利賣樓呢?
恒隆君臨天下真係着數,未開賣已經有其他行家幫佢免費做宣傳,不過人哋九龍站一路都話意向價一萬蚊呎,𠵱家土瓜灣君臨天下就賣三千幾,唔知真係會畀佢混淆視聽。日後同人講君臨天下,睇怕都要進一步講明係邊個。
炒家班好多人參加
樓市發展不斷轉變,地產代理要順應潮流,先至搵到食。好似近排炒家(即確認人)用摸貨形式,放售單位獲利個案愈嚟愈多。
呢類買賣同一般有啲唔同,香港置業最近舉辦了「確認人大解構」課程。
透過小組討論、個案分析及填寫臨時合約練習,等前線代理,可以對呢種買賣模式有多啲認識,以及知道有乜需要留意。
課程咁貼市,吸引到逾六十個代理參加。