（新增內容）香港喺周日有103萬人上街反對港府修訂《逃犯條例》，奶媽擺出一副「你有你上街，我有我做嘢」嘅輕蔑臉孔，仲不斷喺度挑機，結果令到事態升級，大批年輕人擒日蜂擁至金鐘立法會綜合大樓附近一帶，佔據馬路，仲與警方爆發嚴重衝突。出現咁嘅場面，拒絕擱置修例嘅奶媽應該負上全部責任。依家連最保守嘅宗教界都促請港府念及蒼生，暫緩修例，點解佢都一意孤行，要斷送一整代人對香港嘅希望呢？最令人心寒嘅係佢接受大台專訪，仲可以自我感覺良好，被網民指佢喺鏡頭前扮感觸，流下「鱷魚淚」。

打從周日深夜港府那篇回應開始，已經引爆咗啲年輕人嘅怒火，好多人對港府死心，揚言要將行動升級，阻止立法會二讀通過「送中」條例。只可惜，奶媽態度依舊，只係話留意到年輕人作出嘅激烈抗爭，擔心年輕人被「推出來」，自言身為兩孩之母，唔願意見到青年因「政治化事件」影響前程。呢番話，就被好多人覺得佢喺度講緊風涼話，質疑佢係咪有同理心。大部份身為父母嘅香港人對於香港自由、人權同法治遭到侵蝕，影響佢哋子女將來喺呢處生活，點會唔擔憂？依家港府漠視民意咁樣谷爆全城民憤，年輕人走上街頭抗爭，俾警察圍住嚟打，邊個父母唔心痛？只可惜身為兩孩之母嘅奶媽，完全無顯示出佢顧及絕大部份港人父母嘅感受。係咪因為奶媽兩個仔都持英國護照，將來唔使留喺香港，佢就可以繼續顯示佢嘅「權力的傲慢」，刺激其他人嘅子女上街？

奶媽仲喺前日一個酒會致辭嗰陣，話香港依家處於「風雨飄搖」，仲多次話有中央支持，唔知佢係咪講嚟壯膽，定係想講嚟壓民意。佢咁講似係想話畀人聽，有中央支持，就不要理會民意。其實依家香港主流民意已經好清楚，係要港府撤回修例，並唔係佢所講嘅「社會各界包容理解」。當然啦，奶媽唔係香港人普選出嚟，對佢嚟講，只要有中央支持咪足夠囉！但佢咁樣輕視民意，只會令香港矛盾進一步激化。佢擒日咁話香港「很快就會見到晴天」，只不過係自欺欺人。

強推修訂《逃犯條例》，對香港有幾大傷害，奶媽應該心知肚明，作為一個受過教育嘅人，應該明白局勢再咁樣發展落去，民憤沸騰，一定係悲劇收場。即使夾硬通過修例，佢嘅管治威信一定大受衝擊，再難以管治落去，香港變成個爛攤子，亦都令中共顏面無光。

依家睇嚟，「事不避難」嘅奶媽，要全力執行中共交付嘅任務，佢咁樣漠視百萬人上街表達嘅意願，喺文明社會中極之罕見，弄至今天如此局面，佢有不可推卸嘅責任。最可悲嘅係佢接受大台嘅專訪，被問及對於香港百萬市民上街示威、社會不同界別都反對修例嘅睇法時，佢都只係繼續講嗰句：「明白好多事情會有爭議。」同埋講咗個不倫不類嘅比喻，話唔可以去縱容個仔嘅任性行為，否則他日「他後悔，為何媽媽當天不提我？」由此可見，奶媽根本沒有尊重民意、以民意為依歸呢啲嘅概念，佢嘅思想似仲係停留喺「統治者VS屁民」、「父母官VS無知百姓」嘅古老時代。

更加重要嘅係，奶媽將爭取擱置修例嘅香港百萬人，置於中共嘅對立面，對中共嚟講係咪樂見？依家港警已經動用布袋彈同催淚彈對付示威者，局面勢必失控，民怨民憤太深，長此下去，咪又係埋下另一個「計時炸彈」。奶媽擒晚發表近3分鐘電視講話，已明確指出擒日呢場衝突係暴動，叫啲人遠離暴力，但完全無「躬身自省」，仲繼續將責任推畀其他人，亦無提出具體化解當前困局同埋修補社會撕裂嘅方法。去到呢個地步，點會令人唔失望、心死？！

有網民聽完奶媽嘅專訪，一語突破盲點：「妳是公僕，香港民眾才是妳父母。」更有網友將奶媽嘅話，原封不動還給她：「如果我的媽媽常常發瘋，我每次只是遷就她，短時間內母子關係好好。但當媽媽年紀大，因為我只是一味遷就，沒發現她根本得了失智症（即腦退化症），她會後悔，為何兒子當時不提醒我看醫生？」

花生評論員
-----------------------------
【新聞有價】6月17日起 繼續撐蘋果
http://bit.ly/2IJ24ZR

【編輯推介】
唔想錯過兩岸最hit話題？快啲click嚟睇！
【引渡惡法】否認內地武裝力量趕往香港 外交部：妖言惑眾，其心可誅
【直擊郭台銘家鄉】$2,500萬捐山西建生態區 旅遊景點「拍烏蠅」
【玩出禍】嬉戲誤踩油門 鏟車司機撞死工友