開學在即，已停課一個多月的小學生心情矛盾，有些學生在網上留言，透露不想上學的心情，但更常見的是個「悶」字；當中一名自稱喇沙小學的學生，更以英文留下「我憎恨董建華、楊永強和李國章」的字句，惟沒有解釋原因。
在教育城《停課紀念冊》上，有學生留言：「我希望唔好縮短暑假，因為我覺得停課和暑假有很大分別。暑假無咁多功課；停課啲功課係咁畀。暑假有得周圍去；停課日日喺屋企發晒霉。」
「我喺屋企好悶呀，阿媽又唔畀我出街」；「睡覺、做功課、上網、看電視、吃東西，好悶，好想上學」；「超悶。我想返學，我聽到說要復課，我很開心」。總之「悶」聲不絕於網。
但也有學生坦言不想復課，「慘叫」指：「好多功課做！真是好慘啊！」大埔區學生嘉嘉說：「因為放咗好耐假，所以唔係好想返學！又驚中招。」
也有學生留言：「好慘呀，溫晒書先話唔使考試」，因受非典型肺炎影響，教統局已宣布取消六年級下學期考試呈分。
本報記者