左丁山乃係典型香港教育產品,讀文科,係科學盲,文科之中冇音樂藝術(私立中學唔教),故此又係五音不全,油畫山水畫分唔出之輩;好彩碰到幾好嘅國文老師,重叫做識作文。
前星期見到親戚學生C擒擒青咁趕住去補習,順口問佢係唔係補數理化?學生C話:「我係理科生,使乜補數理化呀?去補音樂理論呀!」吓,少有噃,理科生去補習音樂理論,搞邊科?原來學生C以為自己考鋼琴七級已經好醒,滿懷理想,用自修名義,會考加多音樂一科。報咗名就知中計,因為知道啲對手已經考完鋼琴八級,音樂造詣甚高。除考樂器之外,音樂課程包括咗二十首樂曲(十三首西方古典、七首中國音樂),學生要識得背景、欣賞及批評。自修生冇可能搞得掂,於是要搵大學音樂系畢業生補習,補習費幾昂貴。
左丁山認為學生C好有理想、有志氣,值得鼓勵,於是問佢攞咗張音樂清單(SetWorks),走去唱片連鎖店,請店員照單執藥,預備執齊晒就長借畀學生C,叫佢下載落MP3,日日聽,兼且讀吓CD入面嘅樂曲介紹,當係另類補習。呢張清單都幾廣泛,古典音樂分巴羅克時期、古典時期、浪漫時期、二十世紀;中樂分中樂獨奏(梅花三弄、陽春白雪、病中吟、姑蘇行),中樂合奏有「旱天雷」、「瑤族舞曲」、「拉薩行」(一九八四)。讀完之後,學生由巴哈至史特雲斯基,由古琴、二胡,至笛子,統統都有認識,幾唔簡單噃。
店員非常合作,搵到十七張CD,只係搵唔到關迺忠:拉薩行;韓德爾(ConcertoGrosso,Op.3,No.1)以及海頓(StringQuartetinD,Op.64,No.5)。假如有啲有心人將所有會考SetWorks輯成一張CD,加埋大學教授講解,左丁山一定買埋,不過考音樂嘅學生人數少,相信冇乜市場,呢張CD要賺錢就唔容易咯。