西甲馬德里體育會禮拜二晚喺官方網頁公佈，西班牙國腳前鋒迪亞高哥斯達（DC）已經正式重返球會，今季會著18號波衫。

DC上季同車路士開始變得關係惡劣，最終上個禮拜藍戰士達成協議將佢賣番畀馬體會，佢上禮拜六同埋今個禮拜一通過體測之後已經簽約，DC亦都可以跟球隊練波，但因為馬體會受制於國際足協（FIFA）嘅禁令，迪亞高哥斯達要等到出年1月1號先至可以上陣比賽。

馬體會並無提到DC今次轉會費係幾多，亦無講過佢簽咗幾多年約，不過之前有報道指迪亞高哥斯達嘅轉會費係高達5,800萬鎊，同艾華路莫拉達今個夏天上「車」嘅轉會費一樣。西班牙嘅報道就話DC今次係簽約到2021年夏天。咁啱馬體會禮拜三晚就會喺歐聯主場鬥車路士，唔知DC到時會唔會喺球隊嘅新主場等干地嚟到呢？