王維基嘅HKTV拎唔到免費電視牌，一石激起千重浪，除咗揭開政府黑箱作業之外，無綫一台獨大多年嘅霸權亦成為網民所嫌棄，不過無綫不單冇從善如流，竟然仲製作出儼如《ATV焦點》嘅《東張西望》特輯「電視風雲」，公然向市民挑機，網民發起今個月19號台慶熄電視，不過同TVB關係良好嘅陳百祥(阿叻)日前就火上加油，繼續挑釁市民話如果台慶日收視得返2、3點，就跪返屋企。

然後，網民再有對策，其實依家大家一直睇緊嘅收視表，原來只係全港裡面，搵咗800個家庭做統計，無錯係800個，只係比689多少少，就代表晒全港700萬市民嘅口味。而呢800個家庭，係知道自己係收視戶嘅，因為參與調查嘅家庭，有報道指係要拆開部電視機裝入零件，同時會裝三部機仔，又會多咗兩個搖控，一個係按家庭成員，一個係轉台，一個就係選睇DVD，其實好煩，不過做一年就會有約$1000超市Coupon。

而今日，阿叻無懼網民力量，將「賭注」加碼，話台慶當日收視得2點就「死咗佢」，玩到咁大，佢都係睇死觀眾唔轉台啫。而該fbpage就呼籲呢800位取樣嘅電視家庭，拍低收視記錄儀去到呢個電郵:[email protected]