當年今日
關於我們

【太古和你唱】吳日言家庭日遇防暴警清場 IG出post鬧爆:幾時死

蘋果日報 2020/04/26 00:00

吳日言防暴家庭日太古和你唱

今晚有網民發起到太古城中心「和你唱」,藝人吳日言(Yan)與老公亦在場。下午六時半左右,大批防暴警察到場,一度以「限聚令」為由,驅趕在場市民,Yan連番於IG限時動態報道現場情況,起初她只拍到場防暴警,並打上「幾時死」及「仲未死」的字眼,之後她索性拍片說:「本身想開live,但唔知係咪因為現場人多,所以用唔到個網絡。我係第二次嚟太古和你唱,不過今日有『特別嘉賓』嚟咗,好滋擾呀佢哋!」之後Yan影下防暴警驅趕途人,及跟在場市民對峙的情況,其間她身邊有把男聲表示:「冇晒言論自由喇!戴頭盔喇你睇吓,又想打人喇!」
由於防暴警清場的關係,Yan與老公亦被迫離開,她再次上載多條片到IG限時動態說:「佢都黐線黐筋㗎佢!咁星期日出嚟食飯有乜問題啫!又唔畀人哋喺度等行街喎!我覺得好無理囉,唔怪之得咁多人去同佢理論!但其實無結果嘅,分分鐘俾佢毆添!真係問候佢娘親!好嬲呀,而家標晒汗!我都唔知自己可以做啲乜!淨係好嬲好嬲好嬲!」Yan指自己無辦法之下亦要離開太古城啦,她於限時動態上指,自己首次被防暴警罵:「我諗我第一次被防暴鬧,黐線㗎,又話唔畀人行街又話唔畀人聚集!咩甚麼有目的,佢都多餘!冇心機食飯喇頂佢!」
安全離開太古城後,Yan上載了一張托頭的扁嘴相到IG上,並寫道:「自從上年6月,睇到唔少人無理被鬧、被打、被控告。心想如果自己是當中主角我會點樣做。結果今日兜口兜面被人驅趕,我甚麼都做不到。我好嬲好嬲好嬲,同時好傷心,唔敢相信 香港 真係變成咁。今日喺太古我做唔到啲乜,只能夠睥住啲賤人,完。」還打上「香港加油」的hashtag。
問到Yan為何會現身太古城和你唱?她回覆《蘋果》表示:「我已經離開咗太古城。自己其實住附近,咁啱兩次去行街都遇到佢哋和你唱,今日其實星期日想family day,去食飯同埋去買嘢,本來諗住帶BB出去添,但係好彩後尾冇。我去到太古大概10分鐘,就已經有好多防暴喺現場,我完全做唔到任何嘢,又買唔到嘢又食唔到嘢,被一班防暴驅趕,完全破壞咗我今個星期周末嘅家庭日,本來想同老公拍吓拖,而家都冇喇,破壞晒嚕。」
而戰場亦由太古城伸延至Yan IG,有人留言支持Yan,但亦有大量反對聲音叫囂「只係識鬧警察」、「講咁多你又唔係議員,做咩要咁惹事」,再引來大批支持者湧入,反駁謂:「咁護旗手衝出嚟叫唔叫政治?轉發一點都不能少叫唔叫政治?做全國人大果堆藝人係咪要自殺?」
empty
empty
empty
empty
empty
empty
empty
empty