魔術師甄澤權（Louis）今日同吳若希喺銅鑼灣出席魔術表演，早前Louis表演「杯麵魔術」被網友踢爆穿崩位，佢今日無懼再表演，並改良將杯麵變飯，冇失到手，佢話：「咁多個魔術我最鍾意變杯麵呢個，意義重大，上次件事好多朋友鼓勵我，所以特別表演番答謝大家。」

問佢係咪避過穿崩位？Louis話：「你哋唔會再睇到，唔會再走出嚟，呢個係變奏版，重新設計，希望娛樂大家。」甘比今日帶同一對子女嚟捧場，囡囡劉秀樺將一百元放膠杯，Louis就將之變成金魚。