【讚滕麗名好好】同譚偉權鬧交面紅耳赤 惠英紅激動到喊
張之珏譚偉權玻璃動物園辛偉強小兒麻痺症惠英紅舞台劇失聲滕麗名
惠英紅、滕麗名、譚偉權、辛偉強今日喺銅鑼灣為張之珏執導舞台劇《玻璃動物園》進行綵排,雖然簡短演繹3段戲,但4人經已非常投入,七情上面,紅姐仲眼泛淚光。今次係紅姐同阿滕首次參演舞台劇,佢哋兩人都話好緊張。係劇中兩人演母女,紅姐話喊戲唔多,但由於角色係神經質,所以喺情緒方面變化好大,加上對白又多,搞到每次排練完都好攰:「初時拎起劇本都好緊張,但綵排耐咗,大家掌握到節奏,同埋傾吓將對白加加減減,o依家冇咁緊張。」
做慣惡人角色嘅阿滕,今次飾演患小兒麻痺症嘅柔弱角色,最先要練嘅係講嘢時加尾音。阿滕話經常見到紅姐及偉權聲嘶力竭嗌交,都擔心佢哋失聲,紅姐就話:「阿滕好好,買咗開聲丸我食,驚我失聲。初時我唔識用聲都會聲沙,o依家習慣咗用鼻腔發聲就好好多。」紅姐坦言最擔心係演出時記錯走位。
精選娛聞,喺晒《娛果》
http://fb.com/appledailyent
張之珏(左)執導嘅舞台劇《玻璃動物園》今日綵排,惠英紅、滕麗名、譚偉權同辛偉強都有現身。