上星期日本度過完黃金周假期，多套日劇都冇因假期而受惠，反而關東地區嘅整體均收視下滑，當中只有TBS電視台劇集《小巨人》收視上升以及仍保持住雙位數佳績，噚晚播出嘅第四集更回升達13.5%收視。

《小巨人》由神劇《半澤直樹》嘅伊與田英德擔任監製，賣座電影《真.哥斯拉》男星長谷川博己夥拍岡田將生、香川照之合演，亦有新婚女星佐佐木希參演，故事以警隊嘅內部鬥爭及黑暗面作為核心，首播時收13.7%，第二、三集都有13%、11.7%收視成績。

至於天海祐希嘅朝日台人氣劇《緊急取調室》收視持續下跌，第三集跌至12.4%，而富士電視台起用小栗旬拍住西島秀俊合作嘅警匪劇《CRISIS》，更由上集12%狂瀉3.6%，今集僅收8.4%。富士另一新劇、由桐谷美玲擔正嘅《人100%靠外表》收視更加慘淡，第四集只得5.5%收視，創下該劇開播以來新低。