【讚MIRROR fans敬老】見姜濤暗地裏緊張? 張敬軒:叫佢唔好揩咁埋
姜濤Mirror張敬軒敬老人氣
張敬軒(左)指自己只係險勝姜濤。(攝影:沈健程、羅慧敏、盧妹)
被指同《全民造星》出身嘅姜濤爭「人氣票王」嘅張敬軒,被問到有冇喺頒獎禮上見到姜濤?佢話:「有呀,佢同我say Hi,佢話好緊張,但佢唔知道我見到佢仲緊張,我叫佢唔好揩咁埋,因為年紀差距太大,但係佢哋真係好有禮貌,呢個好緊要。」
提到佢贏咗「人氣票王」,軒仔話:「險勝啫,可能佢啲fans敬老,因為寒冬將至,為免啲老人家平安鐘長鳴,所以佢啲fans先收手。不過我覺得MIRROR係今年嘅人氣王,除咗傳統唱片公司同大台做歌手之外,多一個途徑令年輕人實現夢想。」咁有啲咩心得傳俾啲新人?軒仔話:「我覺得我哋講嘢用字好唔同,頭先同佢哋講嘢,好似唔係好聽得明咁,一臉黑人問號囉。」
軒仔又提到:「最近幾日打完HIFU(高能量聚焦超聲波),好似被人冚咗幾巴咁,其實我有幾個法寶可以對付啲新人嘅,防止地心吸力,盡量抬高個頭同早啲瞓。」
軒仔喺今晚嘅頒獎禮上,連掃4獎,包括「本地男歌手」、「年度熱搜歌曲」(《天才兒童1985》)、「人氣票王」及「最具號召力香港男藝人」,問到佢係咪對年底頒獎禮更有信心?軒仔話:「今日絕對係強心針,自己今年都俾一個幾高嘅分數,都當自己新人咁做,19年希望力創新高。」而軒仔更話將會喺YouTube度開一個頻道,會好似啲YouTuber咁拍啲娛樂節目。
精選娛聞,喺晒《娛果》
http://fb.com/appledailyent