雖然話港股悶局，但好多散戶仍然習慣開市時走去證券行或銀行，望住「金魚缸」（股票機）同戰友打躉吹水。原來恒生銀行（011）都有個專畀熟客吹水嘅交易室，不過，要係交易量有番咁上下嘅「尊貴散戶」先至可以入去坐，普通客都未必知道有呢個專區！
唔講唔知，原來恒生中環總行，設有一個特選客戶交易中心，即係專畀頻繁交易客戶睇股票嘅「大戶室」，呢項度身訂做服務，以往設係總行地庫3樓，大半年前就搬上一層至地庫2樓，地方亦闊落少少。

吹水自在啲

呢度一半地方放晒股票機，同一般證券行分別不大，另外一邊就擺梳化、茶几。恒生執行董事馮孝忠（Andrew）拒絕透露，交易量幾大先至可以成為特選客戶。不過，佢為咗令呢班客吹水吹得自在啲，就度咗條橋，將呢個交易中心擺有梳化嘅一邊，收市後變為「茶角落」，畀大客跟同事傾偈，或者同事之間開會度橋都得。
佢哋亦唔係求求其其，會買定靚茶葉奉客，好似鳳鳳單叢、六安、鐵羅漢等。Andrew形容，呢個地方比較靜局，除咗大客坐得舒服，有時同事用作開會，「捽數都可以飲住茶捽，relax啲」，即使俾人照肺，感覺都良好啲咁話喎。

李華華
mailto:[email protected]