馮仁昭四圍超：
「有冇同媽咪錫錫」 林海峰俾囡囡考起 - 馮仁昭
蘋果日報 2008/04/25 00:00
林海峰（阿Jan）出咗名轉數高，所以佢開騷講棟篤笑，吸引到好多觀眾入場，每場都爆滿，但係叫佢對住屋企個囡囡，就即刻被考起。噚日阿Jan、李克勤同埋吳君如一齊出席商台《在晴朗的一天出發》活動。今次嘅主題係圍繞住啲小朋友，會為小朋友爭取權益，君如會錄聲音專欄、克勤就負責唱兒童主題曲。
小朋友專注力低
阿Jan透露：「嗰日個女問我有冇同媽咪錫錫，我聽見佢咁問，都唔知點答，咪即刻叫佢快啲瞓。有時我坐喺電腦前面做緊嘢，佢會突然撲出嚟問我係乜嘢。同啲小朋友講嘢，要趁佢哋專注啲嘅時候講，因為佢哋持久力可能得三分鐘。我覺得克勤會叻啲，識執生，可以兜得好快。」在旁的克勤非常得戚咁話：「好彩我仲未遇到呢啲情況啫！」
林海峰同彭羚錫錫都俾囡囡睇到，下次要小心啲啦。 資料圖片
克勤湊仔唱兒歌
由於克勤剛剛榮升做爸爸，所以開口埋口都講湊仔，最近佢又開始問定啲有關細路仔升學嘅資料，除此之外，佢仲話想唱兒歌㖭。克勤話：「我想買唱片畀個仔聽，但係唔知可以買乜嘢碟，所以我好想出一張兒歌碟，我諗應該有市場。」另外，有指克勤同譚詠麟聯手，爭住要紅館重開嘅第一個檔期開騷，克勤話：「係入咗紙，但未知紅館幾時開番，其實做『左麟右李』係好開心，希望可以喺農曆年再開。」
吳君如有女萬事足，所以樂意為其他小朋友出力。