唐英年民望至今仍大幅低於梁振英，除了令梁振英有更多政治籌碼、爭取中央接受「棄唐取梁」做下屆特首外，也反映唐營至今仍找不到板斧催谷民望，有政界中人更預期，若唐營未來兩、三個星期仍無法收窄與梁振英民望差距，「到唐、梁同台辯論，唐英年（民望）就更難反彈、只會跌得更狠」。
有政界中人指出，縱使建制陣營不斷傳出，中央仍以唐為下屆特首「真命天子」，但梁營卻有其一套逼中央「棄唐取梁」策略，而且至今一直十分成功，「佢（梁振英）打民望牌，由開頭傳唔畀佢入閘、到可以入閘陪跑，再去到家擺明係唔想做陪跑，要贏埋唐英年做特首，梁振英係好成功咁用高民望，一步一步逼住唐營打」。

「冇晒板斧谷民望」

該政界人士又指，今次民調同時曝露唐營過去一段時間的競選工程，完全無助他提升民望，「你可以話唐營行錯路，但更大可能係佢哋出完班星級支持者之後，已經冇晒板斧谷民望」。
若唐英年未來兩三個星期，仍無法令他的民望反彈，該政界人士預期，到唐、梁兩人同台辯論，唐英年的民望就更無反彈機會，「就連挺唐嘅人都覺得，去到擂台唐英年輸梗畀梁振英」，到時唐民望只會跌得更狠，「只要唐英年民望跌到連兩成都冇，梁振英就更加振振有詞說服中央放棄唐英年，揀佢做下屆特首」。
《蘋果》記者