車路士上個禮拜六出戰足總盃第三圈，盡遣副選之下作客以0:0悶和英冠諾域治，需要回歸主場重賽。作客嘅車路士全場佔盡優勢，射門16次七球中龍而控球率亦都有61%，但最終搵唔到破門機會。領隊干地表示賽果令人失望，而佢亦都不忘同曼聯領隊摩連奴開火，仲話對方係一個正宗小人！
車路士今場畀主力夏薩特、尼高路簡迪同泰拔高圖爾斯等休息，而巴舒亞伊、真禾特、羅拔堅尼地等悉數正選。雖然場面佔優，但車仔嘅攻門冇咩威脅，羅拔堅尼地喺31分鐘曾經喺禁區頂施射，但力度、角度都唔夠。四分鐘後主隊翼鋒祖殊梅菲禁區射遠柱斜出，兩軍上半場互交白卷。換邊後車路士加強進攻，53分鐘韋利安右路突破再傳畀禁區頂無人看管嘅真禾特撞射但偏離目標。兩軍最終以0:0握手言和。

史篤城輸波曉士丟烏紗

至於曼聯領隊摩連奴同干地之間嘅罵戰仍然持續，摩佬之前寸干地係小丑同打假波，而干地亦都不甘示弱，話摩佬係小人：「我視佢係小人。喺你發表呢啲言論前，你一定要注意嘅係，你嘅行為反映自己係一個小人。我對佢以前嘅所作所為非常理解，以前佢係一個小人，𠵱家都係，將來都會係。」
干地似乎同摩佬有好大仇口，佢仲話：「我記得佢笑過雲尼亞里英文差，但到雲尼亞里畀人炒嗰時，佢就着咗件印咗雲尼亞里名嘅衫，呢啲都反映到佢幾咁虛偽！」
除咗車路士，英超李斯特城亦都要重賽，因為佢哋作客同甲組仔費列活特互交白卷。而史篤城就仲衰，作客以1:2不敵乙組仔高雲地利，領隊曉士亦都被炒，傑斯又係接任人嘅大熱，唔知佢今次撈唔撈得成喇。