上季胡森頭馬不達標，但情況一定好過同病相憐的李易達，因為仍有兩次緩衝機會，反而養馬量不足才是當前之急，唯一自救方法便是多贏馬挽回馬主信心給予支持，只好焗打快攻，季初操馬較過往任何一季都要積極，結果前晚成功起孖，總算有個好開始。
在我眼中，胡森目前形勢，不過是由首回合落後三球後追番一粒，油門仍要踩盡，所以現階段捧他的馬，馬房戰意一環可畀滿分。事實今次胡廐兩匹上陣馬「幸運新寶」及「勁勇威龍」都操得好，尤其後駒早前兩次交李富試閘走勢標青，應有機會為胡森再贏。
另一邊廂，告東尼並無趕急交功課壓力，但心急要贏是他個性，原本開鑼日尾場為贏馬黃金機會，出三駒兼且悉數具前速放頭，步速快慢根本由他話事，可惜告仔數口太盡，恐防「萬事勇」、「蓬萊仙子」以及「喜蓮巨星」依照慣常跟前跑法會自己打自己，結果安排了「喜蓮巨星」早段留住多少打保險章，但同一時間又叫「萬事勇」不要放得太急以求埋尾，根本不是這兩駒最佳跑法，最終兩頭唔到岸，前駒跑第二，「喜蓮巨星」則姍姍來遲跑第三，依後駒過終點時仍未被完全撻着，我認為牠只要一如贏馬般起步搶前，放不出也跟守二三位，這場頭馬根本不會失掉，輸的是告東尼打錯盤數。論實力「喜蓮巨星」是準一班馬，再出大有機會補中。
周日告仔出八駒，以第七場「英勇大師」餐士最好，論馬暑期後進度亦佳，加上左計右計，也只是要過「追風駿足」一關，應可計啱數如何招架，順利開齋。