睇勻周日都唔係好見有冷嘢會出現，個人認為賠率過3倍嘅都叫做好分，一於吼實[-1]嘅「和局」互串。利斯菲體育會主場出名夠勁，但對手明尼路有番咁上吓火力，小勝格局。
利斯菲體育會季初要應付自由盃同巴甲兩邊戰線，搞到首兩場聯賽1和1負；家陣喺自由盃16強輸咗畀彭美拉斯之後，首度返主場出戰聯賽，應該係贏波之時。不過1.72倍單W似乎唔合本欄宗旨，3.6倍「和局」就啱晒數。事關明尼路借得猛將卡路士阿拔圖來投，球隊上周仲贏埋甘美奧，火力唔差，利斯菲贏一球啱啱好。

博波圖開足4球

另一場有機會開「和局」嘅，相信係韓職FC首爾作客小勝大田市民。大田市民都係嗰啲主場硬淨嘅球隊，對住亞冠盃分子浦項制鐵輸唔到之餘，迎擊傳統勁旅城南一和都係輸1:2。FC首爾啱啱喺亞冠盃砌低大阪飛腳入咗16強，信心、士氣增之餘，預期要回氣，再揀3.35倍「和局」，半全場就要「和/客」，贏得險嗰隻。
葡超波圖雖則攞咗聯賽冠軍，但呢場波主場對布拉加，賽後肯定開party。布拉加贏輸都肯定有歐洲賽資格，兩邊放開嚟踢，「大」實冇走雞，1.95倍抵博，我就會買總入球「4球」，博佢開4:0、3:1。最後博大霧要埋熱刺5.3倍「半勝」，話晒近6次作客利物浦，6次都開「半和」未輸過，進取啲博領先上半場。
文：畢傑