當年今日
關於我們

知己知彼靠交流 - 左丁山

蘋果日報 2005/09/26 00:00


日本商人康本健守捐款畀中文大學,總數一億零三十八萬幾,當然係一個大數目,一位外籍商人肯捐巨款畀本地大學,令人感動。香港好多富翁捐錢畀英美大學,呢位康本健守先生應該係第一位外國人捐咁多錢畀本地大學。康本健守話支持中大嘅國際化理念、促進各地文化交流嘅工作,所言甚是,各地大學、學生加強交流、研究嘅話,溝通會好啲,和平共存嘅機會大好多。
竟有人問中大為何要收日本人捐款,實在眼光短淺之至。中國國力由清朝嘉慶年間開始下滑,至到一九七八年止,共一百八十二年,中間被西方列強與日本欺負,衰到貼地,主要原因為政權不開放,閉關自守,不知己、不知彼,其他唔講,中國百多年來視日本為敵,但其實對日本知道多少?革命先烈戴季陶留學日本四年(一九○五—○九),一九一二年二十一歲就做孫文秘書,一九四九年二月逝世,只得五十八歲。一九二八年(三十七歲)出版一本書叫做《日本論》,裏面就慨嘆日本人研究中國之深,中國人對日本認識之淺。七十七年之後,我哋睇《日本論》,不妨諗吓香港人、中國學者對日本認識有幾多、幾透徹?
日本早稻田大學歷史學部研究生可選讀一科中國古代史,主要研究漢書、後漢書、晉書、唐書、隋書,姑勿論有幾多學生選修,人家歷史系夠膽開呢一科,已經知道佢哋對中國研究之用功,今日中大港大歷史系有冇呢一科,左丁山唔敢肯定,但計埋內地、台灣,有幾多間大學能夠教授日本古代史呢?至於現代方面,日本啲大商社、野村總研等等,都唔知收埋幾多中國資訊、資料。香港嘅大學,收到日本人捐款,以後如能加強港日、中日交流、日本研究,係大好事,千祈唔好閂埋門認叻,盲目排外。