Internetforum:金價跌唔使驚喎!

蘋果日報 2008/01/20 00:00


金價上個禮拜由高位大幅回落,最低曾見每盎斯870.7蚊美金,上周收報883.17蚊美金,較914.3蚊美金歷史高位,跌3.4%。難怪商品大王羅杰斯掃熊貓金幣,但《香港討論區》嘅網友就擔心跌完股市冧金價,快樂小司機話:「金價回得好得人驚喎,穿咗880蚊美金,可能係商品市場大調整嘅開始。」
唔少網友估點解金價跌得咁急,No47諗:「會唔會俾啲大陸佬炒燶咗呀?」Him1987話:「可能係金價已經見頂。」網友Andytang就好樂觀話:「金價升得太多,出現借勢調整,全年估計金價會喺1000蚊美金樓上,當大家發現美元跌、股市唔掂、通脹又升,就會買金保值,短暫沽貨獲利實有嘅。」
Pkelf亦相信,「調整吓好正常,由600蚊美金睇到𠵱家,都唔知調整過幾多次啦,每次都升番。」
Iso9000亦話:「咁先至有平金買㗎嘛!」pooh1971更講:「跌就跌粒糖,升就升間廠,唔使驚噃。」