網絡創作歌手姊妹謝芊彤同謝芊蕾今日去到新城宣傳新歌《八芭啦笨爸》，佢哋指首歌唔講關於爸爸嘅嘢，係想講現時城市人太大壓力，應該要好好輕鬆下，身為網絡歌手，佢哋坦言因為知名度未太高，所以現時近乎零收入，佢哋話：「平時間中會有兩、三個騷，另外又會教人嘢，唱歌、琴同結他只要大家想學乜就教乜。」妹妹芊彤就嚟大學畢業，不過姊妹兩人都未有計劃搵一份正職做，佢哋解釋因為創作需要好多時間，暫時都想搵兼職工作為主，雖然父母都冇畀壓力佢哋，但坦言每逢親戚聚會被問及近況就會尷尬，所以佢哋都想搵下有冇可能做下小生意令收入穩定又方便創作。