Kevin仔(李健宏)噚晚喺九展舉行《玩爆你個腎Live》音樂會，有何超儀、吳雨霏(Kary)、JoeyTang、LMF做嘉賓，Kevin原先喺台上想多謝入場觀眾：「我都知啲飛貴咗少少，你哋都畀錢買飛......」點知話都未講完，台下觀眾已經大叫回水，認真搞笑。佢又同粉絲玩遊戲，掟tee落台送畀觀眾，送完tee又話要送wifi蛋。佢揀咗兩pair情侶，要佢哋喺台下kiss鬥激，贏咗可以上台拎獎品。到頒獎時，佢拎咗真嘅生雞蛋出嚟，蛋上面寫住wifi兩個字，原來係捉字蝨，個得獎觀眾將隻雞蛋拍落佢個頭上面，真係抵拍，不過Kevin都好玩得話：「唔緊要，呢啲係報應。」

有Kevin仔喺度，又點會冇粗口，所以成晚都「媽媽聲」，連阿媽都有到場睇騷，所以當Kevin仔講完一輪粗口之後，佢即笑住話：「死喇!我阿媽今晚喺度呀!不過我返到屋企唔係咁咪得囉!」

Kevin先同JoeyTang合唱《紅色跑車》，之後再同何超合唱《激光中》，Kevin感激何超第一個搵佢做bandleader，第一次學人寫歌仔都係寫畀何超嘅。

至於越嚟越大解放嘅人妻Kary，噚晚着住件大露背泰山裝，Kevin話Kary第一次畀咗佢，就係第一次帶Kary去睇band騷，但眨吓眼婚都結埋。Kary笑話：「係呀!佢第一次帶我去睇band騷時我仲好細，其實我叫佢做uncleKevin，之後佢介紹咗好多同朋友我識。」

Kevin同前隊友LMF合唱時，中途又寸爆BOP：「我舊年睇《天堂鳥》以為好勁，5首歌都可以開演唱會，不過我仲勁，我得4首歌都可以開騷，係新紀錄。」佢同LMF唱咗多首粗口歌，全場觀眾亦都睇到好high。

最後Kevin喺台上多謝媽咪同女友，仲好sweet咁話：「女友令我變咗唔係仆街、而係positiveguy。」

完騷之後，Kevin接受訪問話：「好開心，希望大家當開party咁玩，回憶番10幾年嘅音樂事業，由LMF鼓佬點樣可以變成今日嘅我，我都唔知醜開騷，不過真係好興奮。」訪問時佢仲好搞笑，不斷多謝記者嚟採訪，仲話估唔到有記者會嚟。

講到俾觀眾用雞蛋拍頭，Kevin話：「唔緊要啦!呢啲雞蛋係戰績，我都成日整蠱人，俾人整蠱翻都好應該。」問佢想唔想再搞騷?佢話：「想呀!如果樂壇可以容納到我呢啲唔上唔落嘅人，俾呢個位我玩吓，希望下年再開。」

佢又話喺台上感謝媽咪同女友，其實好難開口，喺屋企會成日多謝阿媽，但台上對住咁多人講會怕醜。個騷女友幫咗我好多，日日煩住佢。」