「韓國oppa」李棟旭今日去VALENTINO活動，現場有過百fans聚集，問到同場嘅劉嘉玲有冇見到李棟旭，嘉玲話：「冇!好少睇劇，都係睇電影比較多，最近追緊一套大陸劇《人民的名義》覺得幾好睇，講貪污，係一啲好成熟嘅演員，題材都好好，所以都追緊。」

講到會唔會有興趣拍大陸劇?嘉玲稱自己形象未可以入到去，要有嗰個味道先得，都諗過可以演咩角色，會唔會做到國企公司嘅老闆，不過都覺得fit唔到入去，嘉玲指反而拍古裝ok，加埋啲造型，依家都拍緊一套做武則天，如果要拍現代劇，就要喺當地生活一段時間先得，直言唔拍辛苦，其實拍劇點都辛苦，做邊一樣嘢都辛苦，咩都要付出，嘉玲話：「反而o依家玩同飲覺得仲攰，o依家都係正常工作同休息，已經少飲咗好多，對我嚟講o依家嘅時間好寶貴，後生嗰陣，覺得自己大把時間、大把春青，o依家就要珍惜，好多嘢都想做要達成。」不過嘉玲唔會俾自己壓力，所以唔會list出嚟，對生命仍然有好多激情同熱情，對工作都有好多諗法。

講到有冇問好友王菲同謝霆鋒嘅戀情?嘉玲話：「唔講喇!一陣又話我做代言人。」

咁知唔知金牌經理人陳自強唔舒服(新聞連結： http://bit.ly/2q5mLGW )?嘉玲直言自己剛返香港，聽日又要飛去北京拍戲，冇聽過佢身體唔好，舊年先同佢慶祝完生日，仲好飲得，講到好似話佢之前心臟唔舒服?嘉玲愕然：「唔係吓話!係咩事都好，都希望佢早日好番，人好脆弱同無常，要鍛鍊好身體，注意飲食。」咁會唔會戒酒，咁啱有侍應捧住香檳?嘉玲拎住一杯嚟飲：「酒其實係好嘢嚟，不過唔可以多，少飲怡情，尤其係葡萄酒，可以通血管。」