當年今日
關於我們

新緋聞男女派對玩到癲
馮仁昭四圍超:黃伊汶「樂仔除衫好正常」

蘋果日報 2004/01/10 00:00


余文樂一直緋聞不絕,有雜誌話佢同黃伊汶拍拖四個月,早幾日女方生日會,余文樂玩到除衫赤膊,而黃伊汶同佢就好親暱,重幫樂仔撥頭髮。噚日樂仔出席一個化妝品開幕活動,佢提起呢單嘢個樣好慘,但自己又忍唔住笑,佢話:「又安排黃伊汶畀我做女友,好無奈,都已經冇乜人肯同我做朋友㗎啦,諗住黃伊汶咁男仔頭嘅女仔,應該冇嘢,點知又寫。」

拒認幫樂仔撥頭髮
而黃伊汶同樂仔嘅前女友盧巧音噚日出席《勁歌》採排,黃伊汶話樂仔同自己要一齊食呢隻死貓,大家都好慘,佢話同樂仔冇發展機會,只係朋友,重話唔覺得樂仔想追自己。佢話當晚樂仔除衫好正常,因為大家掟蛋糕整到件衫污糟晒,總之就冇玩過三級,而幫樂仔撥頭髮嗰個亦唔係自己。
至於盧巧音,就話成件事唔關自己事,亦唔想知,只要樂仔自己開心就得,問佢知唔知雜誌話阿樂畀人睇何B仔,佢話:「咁得意?我冇見過佢呢一面喎,真我嘅一面。」擺明係寸樂仔啦!

鄭希怡怕狂歡報道損形象
鄭希怡(Yumiko)同英皇新小花Koey等人,早前跟英皇老闆楊受成同幾個西裝友上賭船玩,俾人影咗相重話佢哋「一晚狂歡」,噚日Yumiko出席化妝品開幕,佢解釋話因為平時同同事好少見,嗰日得閒先一齊上船玩,冇做過啲乜,個報道對佢形象有影響,所以幾嬲喎。但個報道都冇話Yumiko做過啲乜,只係話佢上船玩咗一晚啫,佢都咁嬲,唔通真係有啲嘢?
張學友唱作《警訊》主題曲
《警訊》為慶祝節目播出三十年,專程搵張學友主唱最新主題曲,呢隻《勇敢的故事》重係由學友首次親自作曲㖭,學友話監製搵佢唱主題曲時,佢拍拍心口就話作曲由自己負責,而佢嘅作曲靈感就係嚟自成龍唱嘅《警察故事》入面頭兩句歌詞「憑傲氣,硬漢子」,大家想知學友作嘅曲好唔好聽,就要留意今晚七點無綫播嘅《警訊》啦!

李司棋籲勿諱疾忌醫
李司棋前晚拍廣告,等埋位時司棋姐喺度睇雜誌,留意梅艷芳嘅新聞,司棋姐話阿梅咁早離世好可惜,佢之前患過子宮癌,佢以癌症康復者身份話,每個人如果發現自己有病,應該及早醫治,千祈唔好諱疾忌醫,作為女人更應該定期做婦科檢查,確保身體健康。馮仁昭都覺得佢講得啱,病向淺中醫,冇咩唔妥啫!

戴夢夢扮飛人嚇到儍
戴夢夢前晚喺紅磡出席莫斯科馬戲團開幕禮,佢話早排曾經拍過一條馬戲團嘅宣傳片,當日佢重要爬上九呎高嘅地方扮空中飛人,嚇到花容失色,拍完之後重糾纏咗二十分鐘至敢爬落嚟,所以佢話睇馬戲好過做馬戲喎。咁高難度嘅嘢你都做到,相信收入都唔少啦!

呂方致電慰問Marianne
呂方噚日去到商台接受訪問,對於王敏慧(Marianne)近日成為眾矢之的,呂方話早於Marianne未入行時已經識得佢,佢話呢個女仔好小朋友,野心唔大,而佢就有打電話慰問對方。另外,呂方覺得一個人去咗世就應該歌頌佢,大家唔好講咁多負面嘅嘢,有乜唔滿意都唔好講。馮仁昭都覺得啱,人都死咗,有啲嘢過咗去咪算囉!
empty
余文樂被拍到喺黃伊汶生日會度除衫。《忽然1周》圖片
empty
余文樂。
empty
張學友
empty
戴夢夢
empty
呂方
empty
李司棋
empty
鄭希怡