韓劇《繼承者們》男星李敏鎬同《漂亮男人》男星張根碩分別透過愛心協議同慈善拍賣會去幫助有需要嘅人，盡顯愛心。

據Holt兒童福祉會相關人士透露，該福祉會同李敏鎬創立嘅官方網絡慈善平台PROMIZ簽咗愛心奉獻協議，因此李敏鎬會聯同粉絲合共捐5000韓圜（30萬港元），用嚟幫助福祉會嘅小朋友。李敏鎬喺簽約儀式上表示：「Holt兒童福祉會同PROMIZ由前年開始合作，我地始終抱住『守護』呢個信念去為小朋友盡一番力，希望呢啲小朋友都可以為創造一個幸福和諧嘅社會而努力。」

而張根碩將同某品牌合作，聽日喺首爾江南區狎鷗亭嘅旗艦店進行慈善拍賣會。旗艦店入面嘅部份商品會以8折出售，並限量發售30件同張根碩合作出產嘅捐贈商品，到時張根碩亦會拍賣自己嘅珍藏品，而所有拍賣會嘅收入將會用嚟幫助生活困難嘅鄰居。