去迪士尼就算做足準備，但人算不如天算，遇上機器壞都係冇計！讀者李先生噚日中午去咗迪士尼，第一時間走去搭灰熊山谷極速礦車，因為佢半年前去嗰陣，架車壞咗玩唔到，今次終於坐到喇！點知李生上到車竟然遇着壞車。

李先生話當時車上約廿個人，坐晒喺度等，由於事發正值中午，超過30℃，陽光非常猛烈，壞車搞到要「曬人乾」！李先生話，坐咗約一分鐘去到上斜位置，成架車突然向前撞一下就停咗。由於衝力大，唔少人都向後撞，「好多人嗌！」之後就傳來廣播話「機械故障」，仲要乘客留喺座位等，曬足15分鐘，先有職員嚟開車門安全鎖，「職員淨係話機件故障！」最終全車人由職員帶領，沿路軌樓梯行返落地面。
大感無癮嘅李先生認為迪士尼應該詳細檢查。而迪士尼就回應，極速礦車因機件故障，一度暫停服務，職員安排約20名賓客，安全離開設施，事件中冇接獲賓客報稱不適或受傷，遊樂設施喺大約下午一點半重新開放。