鄭欣宜新歌《你瘦夠了嗎?》唱出心聲,記得多年前她地獄式減肥爆出瘦身神話,孭着瘦身軀殼的她並不快樂,近年欣宜讓身形自然發展,真我也隨之返來,她說:「基因問題,我飲啖水都肥,我平日食量唔多,眼闊肚窄,亦做好多運動。」
欣宜坦言瘦夠,她說:「試過晒,我一啲都唔回味,𠵱家身形冇問題,冇影響日常生活。講真如果唔係肥番,我係唔會有今日嘅機會,我自問樣冇靚過人,冇瘦過人,身材亦唔會好過人,始終我做番自己,人哋係唔會贏到我。」環顧演藝界胖族寥寥可數,欣宜樂做肥妹icon。
當欣宜拍攝《你瘦夠了嗎?》MV時,曾嫌身後兩位伴舞噸位不夠,自爆曾出詭計:「我想自己出鏡結實啲,唔好意思逼佢哋增肥,我每次排舞就買定炸嘢、pizza同意粉請佢哋食,點知佢哋唔吼。」