今次反送中抗爭，連登、facebook同廣大網民起咗關鍵作用。有內地官媒撐腰嘅「帝吧」網軍早排話要「出兵」教訓香港人同攻擊連登，有傳民陣fb一度俾五毛洗版，何君堯fb又湧現大量貼圖支持，就係帝吧「戰績」，但帝吧前日突然叫停翻牆洗版，有成員爆自己資料被起底，不斷收到來自香港嘅電話騷擾，仲有管理員被報名參軍、捐器官，嚇到帝吧噚日宣佈解散「集團軍粉絲群」，可謂出征未捷身先死，俾連登仔狂恥笑。

有人被參軍　有人變回教徒

帝吧其實係百度貼吧論壇嘅其中一個板塊，本來係討論藝人李毅，後來變咗五毛網軍集中地。內地有傳今次帝吧出征不久已「早洩」，管理員被有關方面「請喝茶」，其後有成員話不斷俾電話騷擾：「帝吧很多人都被問候了，打電話來，就馬上掛了，我現在也不敢去外網留言，感覺他們是有『高技術人員』在支持！」另有網軍公開截圖，顯示大量香港號碼來電：「我被港獨問候了！」

仲有管理員個人資料，包括姓名、身份證號碼、住址、手機號碼、甚至20間銀行戶口及餘額等全被公開；有五毛被報名去偏遠地方參軍，仲填咗信奉伊斯蘭教，嚇到話「感覺真的要報警了」！出征未捷身先死，前晚帝吧宣佈停止聲援何君堯後，不少成員都話「我們認輸了」，其後管理員更宣佈解散「集團軍粉絲群」，聲稱要「保護大家的個人隱私和人身安全」，激到啲網軍生蝦咁跳！有香港網民估計，帝吧輸得咁慘，應該同內地網絡實名制以及唔重視私隱易起底有關，所以要怪，就怪大陸政府啦！
李八方