對於年紀較大的馬，通常都會以往績來衡量其實力，「勁飛揚」在港已上陣五季，拿來作為指標成績的應是11至12年馬季，當年牠五歲，減埋嗰分一降落四班即在田草1600米勝出，開齋後上番三班，轉攻谷草又贏一場，相隔兩仗取得季內第三W。不少自購馬都有這種模式，插班評60餘分不是沒有上升空間，只是需要一點時間適應環境，乾脆扣減分數降至四班執一W，升回原班後仍可大展拳腳。
回說「勁飛揚」的情況，三W之後一季未能再捷，要等到前季國際騎師錦標賽夜，剛好減至60分又可出戰四班，仲抽到高手蘇銘倫壓陣，結果一放到底再嚐贏馬滋味。估唔到上季八歲之齡再能三捷，一把年紀跑得番盛年時的水準，實在罕有！上星期見到馬主柳宇先生，問他這是預期之內還是喜出望外？他老實地說，降四班那場是很有信心的，打叠贏一場馬兒仍然很好狀態，至於季尾贏第三W，馬主講了個我們很少留意的觀點，我們跑馬時不會特別留意馬背所呈的肌肉吧，事實上配了馬鞍想睇也睇唔到。但馬主說「勁飛揚」上季肌肉線條收得極靚，背部兩邊「起」，中間像有條坑，年青時都未見過這般弗爆身型呢！