今次（11日）跑馬地夜馬，用利放的B欄轉C彎跑道舉行，各場形勢都十分緊湊。莫雷拉停賽，田泰安是受惠者，接手了幾匹實力座騎，如「七彩」及「首映」都是新勝馬，值得優先留意。

第六場三班一哩：「明月光」上仗出戰田草1200米都敢郁手，衝入殿軍已發揮應有水準，畢竟非正宗路程，而對手也甚強。

今次跑番首本一哩，雖然上季在四班取勝，但升三班同樣有好表現，僅負於「加州再豫」及「雷公鑿」得季軍，今次負輕磅是其優勝之處，對手無多，是坐位望贏之選。

「情趣」上季贏兩場，三班中距離中級馬，演出尚算穩定，負磅唔重可爭一席，是配腳之選。「中華之光」狀態無須懷疑，但初跑快活谷，未試過谷閘，負重磅將面臨考驗，但潘頓唔放手，做好走位留放，要入一席可做到。

「翡翠福星」熱了身，復課快跳頗墜手，出戰首本路程，可介入爭拼。其餘「勤德兼備」上仗1400米表現唔錯，復課保持好進度，可跟進。

「大運起」進度徘徊。「快樂寶貝」火氣未夠旺盛。「慣勝共贏」熱身後稍好，轉配備增程，都有一定變數。