賓架L亦有出席十月二十三日嘅君悅酒店盛會，佢唔知林在山係邊個，所以聽唔到林在山懷孕嘅傳聞，不過佢同幾位重量級人物握手言歡，傾咗一排先至坐低，再與同座人談政治論經濟。以前商界財金界人士開波，坐埋多數講股票、樓市或美加生活時尚、朋友之間嘅傳聞或者倫敦邊套劇好睇、米蘭Shopping有乜好嘢等等，但近年就好多時講到政治，例如：特首有乜托市大計呀？香港前景點睇呀等等，氣氛零舍悶咗一啲。

賓架L話：「席上有人講，最近有一個名人聚會，出席者都係商界嘅who'swho，好多重係大大聲支持董特首連任嘅人物。個聚會本來係講甚麼國際視野，中國遠景嘅，點知講講吓，人人都提到目前香港情況太曳，令人失去信心，對董特首更加失望。」
商界要人點都要挺董嘅，在公開場合唔講可以唱反調，但在私人場合就乜都爆。譬如一位挺董人士就講過：「參加××諮詢委員會一年幾，係一生最浪費時間嘅工作，董生都唔知想點，啲官更加好似盲頭烏蠅！」
賓架L講到明唔准左丁山寫名或者寫甚麼航運×之類，以免影響啲名人，唔寫就唔寫啦！費事害人，大家都要搵食啫。賓架L更叫左丁山做番啲嘢，特別向外國人唱好香港，維持我哋嘅國際聲譽。左丁山話：「有乜好嘢，即管話我知！」