84歲美國金牌音樂人Quincy Jones最近受訪大爆秘密，作為一手捧紅已故流行音樂天王米高積遜（Michael Jackson）嘅佢，就直指米高積遜抄歌，仲話佢整容係因為受父親影響及虐待造成嘅心理陰影。

金牌音樂人Quincy Jones一手捧紅米高積遜，仲得過27個格林美獎，不過佢就爆料指米高積遜名曲《Billie Jean》係抄返嚟！「我好討厭要公開呢件事，但米高抄好多嘢，佢抄好多歌，啲音符唔會講大話。」佢特別講到《Billie Jean》係抄返女歌手Donna Summer嘅《State of Independence》。另外，佢又提及曾同米高積遜就整容問題對質：「我曾同佢對質整容問題，佢永遠都會話因為自己有病先會咁，廢話，佢係因為爸爸話佢醜樣，又虐待佢，所以先不滿自己外貌。」

另外，佢仲狂踩英國殿堂級樂隊披頭四（Beatles）。佢指保羅麥卡尼（Paul McCartney）為佢聽過以來最差嘅低音結他手：「至於靈高？我講都唔想講，班人全部都唔識玩樂器。」佢指有一次，披頭四鼓手靈高史達（Ringo Starr）用咗3個鐘去錄一個4拍嘅段落，都做唔到。「我哋話：老友，你去食啲嘢，用返個半鐘放鬆下。之後我哋叫咗另一個爵士鼓手嚟，15分鐘就搞掂。」之後靈高仲叫返個鼓手示範一次俾佢睇。

最港電影大獎投票網址
http://bit.ly/thekongestfilmawards

精選娛聞，喺晒《娛果》
http://fb.com/appledailyen